【朗遊書海】讀《像哲學家一樣生活》

今日想同大家介紹一本書，叫做《像哲學家一樣生活》。書名雖然好似好空泛，不過呢其實作者係想介紹斯多葛主義嘅思想，同埋佢點樣用喺我哋日常生活裏面。斯多葛主義係咩嚟㗎呢？其實佢係一個興起於古希臘，然後喺古羅馬好盛行嘅一個哲學思想。古羅馬既環境呢，同而家都差唔多；大家都係好追求名利地位啦財產喇咁呀，男士就可能會追逐權勢啦，女士就會爭妍鬥麗啦。但係呢斯多葛主義嘅哲學家呢就發現，其實就算你得到名譽地位或者財富都好，呢啲都唔會帶來真正嘅滿足。點解呢，其實同人嘅本性有關嘅。因為呢人呢天生呢就係好容易適應現況呀咁，變咗就算你當初有啲新嘅渴求啦，當你真正得到嗰樣嘢嘅時候呢，你會開心一陣，但係好快就會適應咗，然後又有新嘅渴望出現。咁變咗呢，人呢就慢慢就好似進入咗一個慾望之輪裏面；咁你喺裏面行得越快，個慾望之輪就轉得越快，結果永無休止。慾望圈裏面既人呢係永遠唔會得到真正滿足嘅。咁點樣去解決呢個問題呢？斯多葛主義嘅學者就提供左三個辦法。

第一個方法叫消極想象，就係與其去渴望你未得到嘅嘢，不如去渴望你已經得到嘅嘢。咩意思呢？其實如果你諗返起呢，每一個人就算佢好窮好潦倒，其實佢仍然擁有好多野-- 可能係健康既身體，可能係關心佢既屋企人，可能係未來既時間。但係好多時候我地都對呢啲野習以為常，唔覺得有咩特別。所以消極想象既重點，就係透過想象我地終有一日會失去而家擁有既事物，從而珍惜當下，好好利用自己已經有既野。例如每朝起身，我地可以同自己講，今日可能係我人生既最後一日，或者我又同死亡近左一步；或者夜晚見到家人，我地亦都可以同自己講，今日可能係我最後一日見到佢地。除咗想象，我地都可以實際做出嚟；例如每個月抽一啲時間去捱餓受凍，去忍受恥辱；當我地發現自己原來可以忍受到呢啲痛苦，自然會對人生既挑戰更加寬容平靜。

第二個技巧叫控制三分法，就係要將我地遇到既事物分為可控制、不可控制同埋一半一半三種。我哋好多時候，好多既擔憂其實都係擔心緊啲我哋唔係完全可以控制到嘅嘢，例如自己會唔會發達，個女仔鐘唔鐘意我諸如此類。所以斯多葛主義既哲學家就將天下間既事物分成三種，第一種呢就係我哋完全冇得控制嘅，包括太陽幾時升起啦或者今日會唔會落雨之類；第二種係我哋可以完全控制嘅，例如我哋嘅品格，我哋嘅態度；第三樣呢就係嗰啲控制到一啲嘅，即係未完全控制到嘅嘢，例如之前講嗰啲。斯多葛主義既哲學家提醒我地，要將注意力放喺呢啲野控制到既部分，例如與其擔心個女仔唔鐘意自己，不如實實在在去做一個會令人鐘意既人；與其擔心自己發唔發到達，不如專心去研究投資賺錢，提升自己既理財知識。透過咁樣去轉移自己目標呢，唔單止我哋可以更加專注，我哋都會少咗好多擔憂；因為我哋會擔心少好多一啲我哋根本控制唔到嘅嘢。

第三個技巧呢叫宿命論，就係話我哋成日都會對於已經發生左既事覺得後悔；但係透過宿命論我地會知道過去根本無從控制（除非你有天能啦）。咁既然無從控制，根據三分法我地根本唔需要感到擔心或者懊悔，反而相信每一件事無論好壞都係有原因既。最緊要係活在當下，好好把握自己控制到既未來。

斯多葛主義已經有二千幾年歷史，點解到而家仍然有用呢？因為人既本性千百年來其實都冇乜點變過。基於進化既原因，人呢天生就係會好著重眼前嘅利益，好鐘意比較，好著重自己係群體裡面既地位，好容易記住一啲唔開心既野。本來呢啲特徵的確可能令到我地更加容易爭取到資源，更加容易生存同繁衍；但係佢地既副作用，就係可能令我地唔開心。所以斯多葛主義既重點，就係用我地既理性，透過不斷既練習，去減少呢啲人類本性帶嚟既負面情緒同習慣。呢啲技巧同心態，喺古羅馬有用，喺現代呢個更加密集緊張既社會可能更加有用，所以有機會就試下啦。

【朗遊世界】香港故事由誰寫：重訪歷史博物館香港故事展覽

前幾日去左香港歷史博物館既香港故事展覽，因為佢下個禮拜就會關閉重整。記得細個都去過一兩次，不過印象就唔係好深，所以今次嚟到，發現呢個展覽都幾有心思，值得花幾個鐘頭慢慢睇。

展覽既第一部分，係介紹香港既自然歷史，所以係由四億年前開始講起。呢個角度幾有趣，我哋成日覺得香港開埠到而家都只不過係百幾年到，但係香港嘅故事原來可以係由四億年前開始講起。喺呢四億年間，你見住佢介紹香港曾經由一個平原變成淺海，變成沼澤，有過火山，亦都試過變成荒漠，自然有一種滄海桑田既感覺，相比之下人類嘅歷史真係轉瞬即逝。

四億年前講起既香港故事

講完自然歷史，之後就係香港有人類以嚟既歷史。香港故事展覽有一個特點，就係佢嘅歷史觀好混雜-- 佢有時會用一個中原文化既角度同你講香港喺歷朝歷代有啲咩角色，例如鹽場呀港口呀嗰啲；有時佢又會好戀殖，詳細列出英國喺統治香港之後香港有咩發展，甚至將香港歷屆總督嘅畫像陳列出嚟；但係呢突然之間佢又會好親中，喺度同你講香港明天會更好之類。呢啲觀點呢開始會覺得好混雜，但係諗深一層，其實呢個正正就係香港嘅特色-- 就係我哋從來無一個官方嘅論述，唔需要同一口徑，而且容許唔同人有自己嘅觀點。相信呢樣嘢喺香港故事重修咗之後就唔會再有喇，可能變咗成個展覽只會有一個中心思想，就係回歸之後人人安居樂業，天下太平。

香港歷代總督（之後會唔會變成香港歷代特首？）

香港故事係一個好用心嘅展覽。當佢介紹香港民俗，佢就真係會搭番個實物原大既戲棚，幾個人高既盂蘭節紙紮神像同埋太平清醮包山。當佢講到殖民時代，又會搭座行到上去既洋樓，同埋重現番以前醫館、當鋪既樣貌。佢動線既選擇同樣有心思。我地平時行博物館，都會想有一條單一嘅動線，即係話我只要跟住嗰條線就可以行曬成個館；但係香港故事係冇呢個情況嘅，好多時候喺同一個展覽，佢會有幾個入口，同埋唔會好明確話畀你聽要點行，邊一條先係正確嘅路線。呢個係佢嘅特色，亦都係香港嘅特色，就係冇人話畀你聽咩叫啱同錯，好多嘢都要自己摸索，自己去探索出嚟。

幾個人高既紙紮神像，非常吸睛

不過當然啦，香港故事都有值得更新嘅地方，例如佢相對太側重香港戰前既歷史，反而對於戰後嘅事情講得比較少。我相信好多人呢其實對香港嘅集體回憶都唔係嚟自戰前嘅事物，而係戰後先出現嘅一啲標誌，例如公屋、電視節目、輕工業等等，所以歷史博物館都值得花多啲功夫講下。同埋佢而家都會花好多篇幅講回歸，最特別就係佢有一段片，同你回顧返香港由殖民去到回歸中間發生既事。中間我有一幕好深刻，就係當佢講到中國同英國簽署聯合聲明，承諾香港會五十年不變，然後熒幕上面大大隻字寫住“五十年不變”嘅時候，幾乎全場都“唉”一聲歎左口氣；然後講到回歸中英交接既時候，當英國國旗慢慢降落，中國國旗連住國歌升起嗰下，突然有個阿爸抱住既細路女“好野！”咁嗌出嚟。我心諗，呢個畫面都幾有象徵意義。睇嚟隨住香港故事既結束，我地一向所熟識既“香港故事”，亦都會慢慢消失。至於新嗰個故事係點既呢，就睇我地點寫嘞。

慶回歸

（香港遊記之七）