朗遊記: 羅馬尼亞

顯示具有 羅馬尼亞 標籤的文章。顯示所有文章

2024年6月19日星期三

【巴爾幹遊記】Day 17 羅馬尼亞印象

今日離開羅馬尼亞，啟程去塞爾維亞。本來兩地有直通火車抵達，但係好似最近啲司機講唔掂數，結果就要先搭火車去邊境，自己搵辦法過關，喺邊境火車站再買飛搭去塞爾維亞首都貝爾格勒 Belgrade。

今次旅程時間比較緊迫，所以最後都係決定搭飛機。搭飛機當然好方便，個半鐘就到，不過沿途都係平原農田，就無咩野睇。

今朝有啲時間，先食個靚早餐；前面係羅馬尼亞傳統小食，用麵餅包住餡料

搭 Air Serbia 既螺旋槳飛機

沿途景色

塞爾維亞不愧係中國既老朋友，連路牌都有中文

今次去羅馬尼亞雖然時間短，但我既印象都幾好。一方面羅馬尼亞既城市都幾靚，而且仲有唔少 cafe 書店，對我嚟講大大加分；另一方面羅馬尼亞人比我既感覺幾自得其樂，比保加利亞人友善開心。

今次去得好少地方，下次如果有時間，可以自駕去多啲外西凡尼亞既小鎮，去下黑海邊既多瑙河三角洲，或者參加佢地既音樂節，應該都會幾精彩。

羅馬尼亞傳統食物-- 前面叫 sarmale，係用酸椰菜包住肉醬；後面叫 polanta，係用粟米磨碎再整成一舊，有啲似非洲既 ugali，不過好食好多

另一道傳統菜色，係油炸豬肉同香腸，幾 heavy

更 heavy 既係呢道甜品，裡面係油炸麵包，似 donut；出面係 jam 同乳酪/酸忌廉。食第一啖好好味，不過跟住就越食越滯

2024年6月18日星期二

【巴爾幹遊記】Day 16 吸血鬼城堡

尋日行完布加勒斯特，今日 join 咗個 day tour，遊覽外西凡尼亞 Transyvania。傳統上羅馬尼亞可以分為三個地區，其中布加勒斯特呢區屬於南邊，比較受鄂圖曼帝國影響；隔住座山既外西凡尼亞就比較近匈牙利，所以就近歐洲文化多少少。但係由於外西凡尼亞屬於帝國邊陲，所以就保留咗更多獨立性，例如今日去既中世紀小鎮 Brasov，鎮裡面最大既教堂就屬於基督新教，用德文講道。

不過今日 day tour 既重點唔係外西凡尼亞，而係布蘭城堡 Bran Castle。城堡本身係一座中世紀堡壘，無咩特別；不過百幾年前就有個作家以佢為藍本，創作咗吸血殭屍 Dracula，自此城堡一炮成名，成為遊客去羅馬尼亞必訪既地方，吸血鬼亦都成為羅馬尼亞最出名既象徵。

今日嚟到城堡，城堡主人都好識做，喺介紹完正史之後，留咗幾間房特別介紹羅馬尼亞既民間傳說，同埋吸血鬼既來源，等一心獵奇既遊客可以心滿意足離開。不過小小一個城堡竟然收百幾蚊入場費，我睇住遊客源源不絕咁排隊上去，我心諗，真不愧係吸血鬼城堡呢。

外西凡尼亞山勢雄奇，係當地人既滑雪勝地

今日首先去咗 Peles Castle，係當時國王既夏宮

中世紀小鎮 Brasov

小鎮最大既教堂，外牆因為經過大火而變黑，就直接叫做 Black Church

教堂裡面都幾大，睇介紹話因為 Brasov 位處邊陲，所以特登起咗大啲既教堂宣揚國威，屬於半個大白象工程

Brasov 同 Plovdiv 一樣，大街都變咗餐廳/商店購物區

布蘭城堡，外形唔算特別靚，不過真正既城堡就係咁；反而好似最出名既新天鵝堡就係裝飾用途居多

唔知係咪有吸血鬼，所以要整咗十字架鎮住個場

個 banner 設計得幾好

城堡入面都幾趣緻；聽講 Halloween 會有特別活動，唔知會唔會變鬼屋

羅馬尼亞民間傳說展覽

個吸血鬼都幾似盛志文

有關吸血鬼既影視節目

返到布加勒斯特，咁啱遇上羅馬尼亞係歐國盃贏波，好熱鬧

2024年6月17日星期一

【巴爾幹遊記】Day 15 布加勒斯特

今次行程唔算 plan 得好好，喺羅馬尼亞只有兩日半，今日就把握時間遊覽首都布加勒斯特 Bucharest。相比之前去既地方個個都幾千年歷史，布加勒斯特既歷史相對短啲，“只有”五百年。不過喺近代布加勒斯特都發生咗好多事。首先喺一百年前，當時羅馬尼亞國王酷愛法國文化，所以喺布加勒斯特起咗好多法式建築，甚至令呢度有“東方小巴黎”既美譽。

不過二戰後共產黨上台，羅馬尼亞亦成為東歐陣營既一部分。相比其他蘇聯衛星國，羅馬尼亞既獨立性比較強，喺布拉格之春發生時當時既統治者壽西斯古甚至公然違背老大哥蘇聯，向民眾發話，認為人民有選擇既自由，唔肯向捷克出兵。當時壽西斯古得到群眾擁戴，西方欣賞，借到大筆外債，壽西斯古因而大起建設，羅馬尼亞一時欣欣向榮。

不過好景不常，十年後壽西斯古希望擺脫外債，全力出口國內產品，反而令到國內用品供應不足，連基本既油鹽糧食都要配給，搞到民不聊生。加上壽西斯古又學北韓大搞個人崇拜，民眾對佢既不滿日益增加。終於喺柏林圍墻倒塌無耐，壽西斯古又係企喺當年宣佈拒絕出兵布拉格既同一個露台演說；不過今次民怨沸騰，壽西斯古既演說竟然多次被打斷，最後軍隊倒戈，壽西斯古竟然要轉身搭直升機逃走，直至幾日後被人捉到槍斃。

今日係星期日，當年壽西斯古演說既廣場係行人專用區，有人擺檔，有人賣藝，亦有小朋友喺度跑嚟跑去。我望住眼前安和樂利既景象，諗起三十年前腥風血雨，心裡面不禁有啲戚戚然。