【巴爾幹遊記】Day 11 告別希臘

離開塞薩洛尼基，今日搭巴士去保加利亞。

今次喺希臘逗留咗個零禮拜，算係初步了解唔同地區既風貌。如果下次嚟，個人覺得雅典部分就差唔多，反而可以去多啲北部地區，例如馬其頓王國既古都 Pella，眾神既居所 Mount Olympus，同埋只有男人可以去既“聖山”，成個半島都係修道院既 Mount Athos。

另外今次亦無去希臘小島，因為想等埋女朋友先去。如果去的話，除咗最出名既 Santorini，Mykonos 同 Naxos 都係好選擇。如果可以的話，其實我最想由雅典揚帆出海，穿越愛琴海到達對岸既羅德島，唔知以後有無機會呢？

   

進入保加利亞，山嶺變得更綠，唔再光禿禿

保加利亞首都蘇菲亞市郊既住宅建築，感覺好礙眼

保加利亞以前係共產國家，巴士站隔離既雕塑都好有蘇聯味道

希臘美食

今次喺希臘，最深印象既食物有三樣：

1. 希臘燒烤 Souvlaki：通常係串燒豬肉/牛肉，用 Pita 餅包住，加上番茄、洋蔥、乳酪，有時仲會連埋薯條，趁新鮮熱騰騰咁食，回味無窮

 

Souvlaki Wrap 其實係 street food，喺街一路行一路食最有風味

2. 希臘沙律：希臘既沙律通常當主菜食，所以大大碗，而且每個地方，甚至每間餐廳都有自己既配方。有時配埋燒烤一齊食，分量啱啱好

 

每間餐廳既配搭都唔同

3. 希臘甜品：食完飯，如果仲有胃口，可以食埋希臘甜品。呢啲甜品通常都有酥皮同果仁，再加入大量糖漿，所以非常甜，但就唔算好膩，飲埋細細杯既希臘咖啡就係完美既一餐嘞

 
希臘甜品同希臘咖啡其實都係嚟自土耳其

通常甜品都可以喺麵包鋪買到

【巴爾幹遊記】Day 10 苦難故事

尋日講到塞薩洛尼基地位喺希臘北部舉足輕重，但當地其實都經歷過唔少苦難。

話說喺中世紀之後，塞薩洛尼基係鄂圖曼帝國重鎮，甚至係鄂圖曼喺歐洲最重要既城市。當時鄂圖曼人（土耳其人）為咗溝淡希臘人既影響，特地邀請猶太人移居塞薩洛尼基。

有幾百年時間，土耳其人係塞薩洛尼基既領導階層，住喺半山既上城區；但喺下城最主要既居民係猶太人，之後先到希臘人。當時塞薩洛尼基係東南歐最多元既城市，有無數人嚟到呢個港口通商、定居。

塞薩洛尼基地位重要，連土耳其國父凱末爾都係喺度出世，圖為佢既故居

上城區既土耳其建築

不過時間去到現代，希臘由鄂圖曼帝國獨立，一輪大戰後雙方同意交換居民，當時有五十萬土耳其人/穆斯林由希臘被強制遷移到土耳其，而有高達一百五十萬希臘人/東正教徒由土耳其遷移到希臘。一時間塞薩洛尼基既土耳其人聚落被清掃一空，上城區住滿希臘難民。

咁都未算完，二十年後第二次世界大戰爆發，納粹入侵希臘，將塞薩洛尼基幾乎全部猶太人送入集中營，猶太聚落同受毀滅。當時唔單止猶太會堂同住所，連猶太人既墳墓都被破壞，墓碑攞嚟鋪路起屋。終於到戰後塵埃落定，但塞薩洛尼基已經變咗一個純希臘城市，以往既國際化同多民族特色已經不復再見……

導遊展示其中一塊攞嚟鋪路既猶太墓碑，上面可以見到希伯來文


導遊示範樂器 Bouzouki，亦都係我地平時聽到覺得好似希臘音樂既來源

由上城區俯瞰塞薩洛尼基

塞薩洛尼基夜景

上城區既夜晚，感覺好靜謐

【巴爾幹遊記】Day 9 塞薩洛尼基

今日行程有啲匆忙，首先去咗三個博物館，之後參加 walking tour，了解塞薩洛尼基既歷史。

塞薩洛尼基係希臘第二大城市，亦係北部馬其頓地區重鎮。同雅典唔同，塞薩洛尼基建城後二千年嚟一直有人住，而且地位舉足輕重，所以城市面貌比較豐富，行行下街會見到古羅馬廣場，行前幾步會有間千年拜占庭教堂，再行遠少少又可以見到土耳其澡堂。

白塔，以前係守衛塔/監獄，而家變咗城市博物館，每一層展覽塞薩洛尼基既唔同面向

 

由白塔俯瞰塞薩洛尼基；好天既時候隔著海可以見到奧林帕斯山

海邊既亞歷山大大帝雕像；塞薩洛尼基由佢既部將建成

考古博物館，展覽塞薩洛尼基喺希臘同古羅馬時期既文物

拜占庭博物館；由於位置四通八達，塞薩洛尼基喺東羅馬/拜占庭帝國既地位僅次君士坦丁堡

呢張相幾表達到塞薩洛尼基唔同既歷史面向；最前面係古羅馬既皇宮，後面曾經係東正教教堂，不過比鄂圖曼人加左宣禮塔

唔單止係咁，我初步印象係塞薩洛尼基城市機能都比較豐富，市面上有唔少生活用品店，行行下又會有花店、書店、精品店，感覺比較適宜居住。而且塞薩洛尼基人比較友善，唔似雅典人成日木口木面，所以都令我更有好感呢。

鬧市中既古羅馬廣場

採用傳統 Basilica 模式既長方形教堂

比較後期既教堂，模仿君士坦丁堡聖蘇菲亞教堂樣式

土耳其澡堂

喺市中心每條街都有相關介紹，好有意思

塞薩洛尼基既野食都好出名，例如眼前有啲似 pizza 既 penirli（可惜 out fo = =）

【巴爾幹遊記】Day 8 離開雅典

今日離開雅典，不過心情就唔算好留戀。除咗因為雅典好多建築其實都係好近代先起，感覺有啲殘舊之外，亦因為雅典既治安其實唔算十分好，周圍都有商鋪比人爆玻璃，行行下街又會有啲貌似不良少年既人經過，所以心情比較緊繃。

有被爆玻璃既商鋪發揮創意，變成圖案

不過今次能夠見證咁多古跡同文物，感覺都係好開心。最開心係更加認識蘇格拉底呢個人-- 本來喺古希臘廣場讀佢臨死既自辯，只係諗住扮下文青，但係讀讀下又幾入腦，蘇格拉底就好似企喺廣場前面向我分享佢既人生理念，分享咩叫智慧，點樣面對死亡，點樣既人生先算無憾……

今日火車上面無咩景睇

離開雅典，今日搭火車嚟到北部城市帖撒羅尼迦。擺低行李之後無咩行程，剩係去咗海邊行下，吹下海風，感覺都好舒服。

帖撒羅尼迦既教堂都幾宏偉

咁啱見到有婚禮舉行

海邊夕陽

有人賣藝

亦可以搭海盜船出海，好 random 

三個雅典景點推介：
1. 衛城：除咗走上衛城睇帕特農神殿，仲可以去衛城附近既山丘-- 旁邊既 Areopagus Hill、南面既 Philopappos Hill、北面既 Lycabettus Hill，由唔同角度睇，都有唔同感覺
2. Lycabettus Hill：Lycabettus Hill 係雅典市區最高山，除左可以睇到衛城，仲可以睇到雅典全境。推介日落時分搭纜車上山，由日頭一路睇到夜晚
3. 博物館：衛城博物館同國家考古博物館都十分推介，特別係邁錫尼黃金寶藏同古希臘銅像，可以話係全世界獨一無二

三個角度睇衛城

【巴爾幹遊記】Day 7 國家寶物

尋日講到喺邁錫尼剩係見到王宮遺址，今日先知原來全部寶物都運嗮去雅典。嚟到國家考古博物館，我先發現邁錫尼人係活得幾奢華豐富，有滋有味。邁錫尼既國王死時會戴上黃金面具，配上黃金胸甲；當地既女人會戴首飾、修甲、整頭髮；佢地每餐都有海鮮，得閒仲會打下獵，真係令人艷羨。

國家考古博物館

邁錫尼王既黃金裝備

 

仲有金杯金片金戒指

仕女壁畫，可見時下女子甚為姿整

好得意既八爪魚圖案

當然，國家博物館除咗邁錫尼既寶藏，仲有好多雕塑同文物。由於年代久遠，希臘雕塑喺其他博物館往往都只有一件兩件，仲要件件都係鎮館之寶，例如羅浮宮就有米洛維納斯、勝利女神像。不過由於有主場優勢，呢度既博物館就曬冷咁全場都係希臘雕塑，仲有好罕有既青銅塑像。

波塞冬/宙斯銅像，動作逼真，不過唔知掟緊既係閃電定三叉戟

賽馬銅像，唔講仲以為係現代作品

喺博物館仲竟然撞到網友，好開心

離開博物館，夜晚搭纜車上咗雅典最高既山頭，再次俯瞰衛城，以至雅典全境。睇住日色漸渺，新月初升，一眨眼，好似番咗神話時代：

阿波羅沉沉睡去
阿蒂米斯悠悠醒來
向衛城灑下清冷月光

我望向夜空
看見眾神爭戰
看見眾神飲宴
一轉念

回到三千年前

山上既鐘樓，山下既衛城

俯瞰雅典，一路到海邊；中間可以見到第一屆奧運會場地

日落

長日將盡，新月初升


雅典夜景