顯示具有 塞爾維亞 標籤的文章。 顯示所有文章
顯示具有 塞爾維亞 標籤的文章。 顯示所有文章

2024年6月22日 星期六

【巴爾幹遊記】Day 20 塞爾維亞印象

今日離開貝爾格勒去薩拉熱窩。唔知係咪因為國旗相近,塞爾維亞人比我既印象同俄羅斯人都有啲似,都係大大份,平時都幾輕鬆容易相處,但係去到某啲位就可能會觸動到佢地既神經。

不過我暫時去幾個巴爾幹國家,塞爾維亞人係對我最友善既。唔知係我敏感定點,之前喺希臘,喺羅馬尼亞,我都會覺得當地人對歐美白種人態度會好啲;唯有嚟到塞爾維亞,呢度既後生仔行行下會同我 high five,又會有老人家攞住本護照同我講佢以前去中國既經歷。雖然有人打招呼係開心,但我感覺都有啲矛盾,因為唔想塞爾維亞同中國咁 friend 呢。

穿過邊境,巴士轉過角落,視野豁然開朗,我先知原來薩拉熱窩唔單止有河,仲係一座山城。喺民宿安頓好,食完飯喺河邊行下。我聽住《薩拉熱窩的羅密歐與茱麗葉》,抬頭望上山,山上面既小屋,就好似點點繁星……

回望貝爾格勒

途中經過既小鎮,應該屬於塞族共和國

 
遠眺薩拉熱窩

波士尼亞傳統菜色,喺用肉碎、米飯塞入蔬菜裡面

河邊望去山裡面既小屋


夜晚既拉丁橋,亦都係第一次世界大戰既起源

2024年6月21日 星期五

【巴爾幹遊記】Day 19 貝爾格勒

尋日講過塞爾維亞,今日講下貝爾格勒 Belgrade 呢個地方。

貝爾格勒係塞爾維亞首都,位處兩條大河交匯之處,傳統都係兵家必爭之地。由羅馬人開始喺度起城堡開始,貝爾格勒咁耐以嚟經歷過大大小小百幾場戰役。咁多年嚟,貝爾格勒試過被攻陷,被火燒,被屠城,被夷為平地;但因為位置險要,所以一直都有人嚟爭奪據守。直到而家,貝爾格勒大部分建築都係得一二百年歷史,而且風格多變,由早期既西式建築,到共產時期既野獸派水泥建築,到現代既高樓大廈都有。

不過撇除過去既苦難,其實貝爾格勒又係一個生活幾豐富既城市。呢度治安幾好,市容幾整齊,周圍都有公園超市 cafe,夜生活都好豐富,本地人仲興喺餐廳裡面現場奏樂,好有氣氛。就好似本地團導遊所講,只要和平無戰爭,市民自然就會去創造自己既生活,搵到其中樂趣,只要和平無戰爭……

羅馬人最早喺貝爾格勒河邊起咗白色既城堡,所以本地人就將呢個地方叫做白城 Beo-Grad

薩瓦河 Sava river 同多瑙河 Danube river 交匯之處

跨過薩瓦河,就係新城區,嗰度有好多共產主義建築。喺河邊可以見到新發展既高樓大廈

 
貝爾格勒城堡展覽既兵器

路邊既貝爾格勒市徽,可以見到白色城堡底下既鮮血,同埋象徵和平既藍色天空

大街上面既西式建築

市中心好出名既莫斯科酒店,採用新藝術風格 Art Nouveau 建造。導遊話呢個建築好靚,我就覺得有啲恐怖 :P 


Above us only sky……

 
夜晚嚟到波西米亞區食飯,當地人隨住現場奏樂翩翩起舞,好有興致

2024年6月20日 星期四

【巴爾幹遊記】Day 18 塞爾維亞

今次嚟巴爾幹半島,其中一個原因就係睇下點解呢度係“歐洲火藥庫”。而巴爾幹之所以咁亂,好大原因就係同跟住落嚟會去既塞爾維亞、波士尼亞、克羅地亞呢三個同文同種既國家有關。今日就喺 Belgrade 貝爾格勒參加本地團,再參觀博物館,首先嘗試從塞爾維亞既角度了解呢段歷史。

話說一千年前,拜占庭帝國既勢力喺巴爾幹半島衰退,斯拉夫人就乘機成立自己既國家,是為古塞爾維亞王國。古塞爾維亞全盛時期曾經佔領巴爾幹半島既西部,但最後比鄂圖曼帝國打敗,慢慢成為帝國既一部分。

時間再過幾百年,今次輪到鄂圖曼帝國勢力衰退,塞爾維亞人就再次成立自己既國家,更一度聯合其他斯拉夫人,成立南斯拉夫王國。不過南斯拉夫王國以塞爾維亞人做中心,其他民族被排擠,就搞到克羅地亞人好不滿。終於到咗第二次世界大戰,克羅地亞喺納粹支持下獨立,甚至實施種族清洗,殺咗幾十萬個塞爾維亞人,仇恨既種子就此種下。

喺二戰之後,南斯拉夫仍然存在,不過今次就變咗由強人鐵托統治既社會主義國家。鐵托本身係克羅地亞人,但心態更似一個南斯拉夫人,一心希望平衡各方勢力。為咗削弱塞爾維亞人既影響力,鐵托將波士尼亞由塞爾維亞切割出黎,甚至將南斯拉夫分成六個民族。當時南斯拉夫喺巴爾幹半島舉足輕重,同印度、埃及組成不結盟運動,連蘇聯都要禮讓三分。

不過喺鐵托死後,當初格硬統合既南斯拉夫都係四分五裂,而且經濟比較好既斯洛文尼亞同克羅地亞立即要求獨立,軍方就喺塞爾維亞人既主導下展開內戰,最終又係死咗十幾萬人,要到聯合國轟炸塞爾維亞,南斯拉夫內戰先算完結。

雖然戰爭完結,但係塞爾維亞仍然覺得好孤立,尤其之後因為科索沃問題比北約又炸過。直到今日,塞爾維亞仍然入唔到歐盟,唯有親近北約以外既國家……

 
塞爾維亞國會,國會前面既馬匹象徵權力,代表人民有權送議員入議會,亦有權拉佢地出嚟

左邊係以前既王宮

Tesla 博物館,人頭湧湧。Tesla 係喺奧地利帝國出世既塞爾維亞人,而家變咗塞爾維亞既民族英雄

 
St Sava 大教堂,係巴爾幹最大既教堂,裡面金碧輝煌


博物館裡面描繪古塞爾維亞皇帝加冕既壁畫,好有威勢

 
南斯拉夫博物館,展覽南斯拉夫歷史,同埋當年各國送比鐵托既禮物

斯大林就曾經送咗呢個叫做“決鬥”既瓷器比鐵托,唔知有咩含義

曾幾何時,南斯拉夫所有機構都要掛起鐵托像

南斯拉夫博物館旁邊就係鐵托既墳墓

大街旁邊既標語

當年北約轟炸留低既建築,特登維持原狀,以作紀念

意義的追尋

體驗人生 從小我就很喜歡思考,長大後特別喜歡思考人生的意義。 基於對意義的追尋,中學時候也曾上教會,希望從基督教尋找答案。 回想起來,其實教會生活挺為適合自己,不但有我所喜愛的讀書和音樂活動,有一班弟兄姊妹互相支持,而且對於生存和死亡的問題都有完整的解答。 但我終究難以接受以一個...