朗遊記: 保加利亞

顯示具有 保加利亞 標籤的文章。顯示所有文章

2024年6月16日星期日

【巴爾幹遊記】Day 14 保加利亞印象

今日係喺保加利亞既最後一日。說來慚愧，其實我嚟保加利亞之前，對呢個國家近乎零印象。唯一諗起既保加利亞人，係哈利波特裡面妙麗既前男友喀浪。

嚟到 Plovdiv，呢度啲人果然同電影裡面既喀浪一樣身形高大，而且好多都剪平頭裝。同保加利亞人相處，我會覺得佢地都幾友善，友善得嚟都好有性格。我剛剛到埗唔記得唱錢，上到巴士攞住歐羅，巴士個大叔會大喝一聲，然後搣張飛掟比我。我參加本地團，有團友傾計比較大聲，導遊又會喝停佢地，話佢地阻住佢講野。

不過有一點我感覺唔係幾好，就係保加利亞人好容易會覺得人地唔啱。我民宿個熱水器壞咗，房東雖然即時上門整，但言談間又會覺得之前都無事，所以今次係你 “bad luck”；我今朝去餐廳問有無早餐食，個店主又係即刻入咗去整，之後我想點餐時先眉頭一皺，話我做咩唔講清楚。

雖然唔想造成刻板印象，不過呢啲經歷會令我覺得，保加利亞人好易比人誤會；然後又會諗起喺近代咁多場戰爭，保加利亞幾乎次次都企錯邊，結果比人圍剿，唔知有無關係呢？

下晝四點坐巴士去羅馬尼亞，原來巴士既終點係基輔，難怪會凌晨一點先去到首都布加勒斯特。我由 Plovdiv 去番 Sofia，當時座位都鬆動，有空間可以伸下腳；點知喺 Sofia 出發既時候竟然全車滿座，然後我地就一路向北，跨越巴爾幹山脈，越過多瑙河，終於凌晨兩點嚟到布加勒斯特。

因為誤會而出現既保加利亞英式早餐

行到差不多，去番我最中意既民俗博物館外面坐下

臨行前食多個沙律。Plovdiv 有啲地方都幾 touristy，眼前既沙律擺盤咁靚，價錢自然都唔平得去邊

去巴士站途中經過公園，感覺都舒服

Plovdiv 去 Sofia 途中景色

穿過巴爾幹山脈

2024年6月15日星期六

【巴爾幹遊記】Day 13 悠悠閒閒

今朝落咗場雨，落完雨天朗氣清，街上面涼風陣陣，非常舒服。自從嚟到東南歐，天氣一直唔算特別好；希臘就又熱又乾（最近仲好似有熱浪），Plovdiv 就又熱又濕。一直到今朝，先搵番好懷念既歐洲感覺。

Plovdiv 舊城區唔算大，尋日已經睇得七七八八，所以今日都係行下教堂，寫下明信片之類。不過咁樣悠悠閒閒既感覺都幾好（尤其今日天氣唔錯），有時旅行都唔使搞到咁 chur 呢。

不過今日可能係呢次旅程最後一日咁悠閒，因為聽咗網友意見，決定會去埋阿爾巴尼亞，所以行程編密咗，之後就應該無好似今日咁既日子了。

睇啲雲就知天氣好好

參觀下市中心既清真寺

喺旁邊既 cafe 飲下土耳其咖啡

Plovdiv 市區，右下角係羅馬遺跡

銅像既主角叫 Milo，係當地以前一個聾啞人士，大家都會同佢講秘密，慢慢就變咗 Plovdiv 既吉祥物

遠處山上面就係舊城區

東正教教堂，通常都有好華麗既屏障隔住大堂同裡面既聖所

咁啱見到嬸嬸喺度填色復修，偷影一下

天氣好，尋日去過既民俗博物館都特別靚，有少少童話感覺

日落時分上咗市中心旁邊既山，山上面係以前既紅軍紀念像

俯瞰 Plovdiv

Plovdiv 三面環山，遠睇都幾壯觀

睇埋日落先走

行山行得咁辛苦，都要食下野獎勵自己

2024年6月14日星期五

【巴爾幹遊記】Day 12 普羅夫迪夫 Plovdiv

今日主要喺普羅夫迪夫 Plovdiv 既老城區出沒。Plovdiv 係保加利亞第二大城市，歷史悠久，曾被選為歐洲文化之都。

當初捨保加利亞首都索菲亞而去 Plovdiv，係因為覺得索菲亞太過都市化；但嚟到 Plovdiv 後反而有啲後悔，因為保加利亞既交通網絡以索菲亞為中心，所以索菲亞其實有一日遊去齊 Plovdiv 同里拉修道院；反而 Plovdiv 既交通就無咁便利。不過點都好，既來之則安之，一場嚟到，自然要周圍睇下。

Plovdiv 作為千年古城，亦都有古羅馬遺跡，甚至有一座能夠容納三萬人既古羅馬競技場。不過而家 Plovdiv 最多人參觀既，係位於老城區既精致大屋。呢啲大屋都係 Plovdiv 既商人喺百幾二百年前興建，當時係鄂圖曼時代末期，唔知係咪因為管控鬆弛，呢班商人生意越做越大，就乘機起豪宅炫富。而家呢啲大屋經過復修，望落去各有特色；不過屋裡面介紹唔多，所以就唔算好觸動到我了。