【巴爾幹遊記】Day 12 普羅夫迪夫 Plovdiv

今日主要喺普羅夫迪夫 Plovdiv 既老城區出沒。Plovdiv 係保加利亞第二大城市，歷史悠久，曾被選為歐洲文化之都。

當初捨保加利亞首都索菲亞而去 Plovdiv，係因為覺得索菲亞太過都市化；但嚟到 Plovdiv 後反而有啲後悔，因為保加利亞既交通網絡以索菲亞為中心，所以索菲亞其實有一日遊去齊 Plovdiv 同里拉修道院；反而 Plovdiv 既交通就無咁便利。不過點都好，既來之則安之，一場嚟到，自然要周圍睇下。

Plovdiv 作為千年古城，亦都有古羅馬遺跡，甚至有一座能夠容納三萬人既古羅馬競技場。不過而家 Plovdiv 最多人參觀既，係位於老城區既精致大屋。呢啲大屋都係 Plovdiv 既商人喺百幾二百年前興建，當時係鄂圖曼時代末期，唔知係咪因為管控鬆弛，呢班商人生意越做越大，就乘機起豪宅炫富。而家呢啲大屋經過復修，望落去各有特色；不過屋裡面介紹唔多，所以就唔算好觸動到我了。

最靚既大屋，而家係 Plovdiv 既 Regional Ethnography Museum，展覽傳統保加利亞人既穿著同習俗

保加利亞人傳統最重要既位置係火爐邊，佢地相信火能夠驅邪。但新娘嫁入嚟，第一件事就係喺火爐加柴，代表正式成為家庭既一員

當時保加利亞既有錢人會去耶路撒冷朝聖，番嚟會帶埋幅華麗繪圖紀念。去過耶路撒冷既東正教徒，就好似去過麥加既穆斯林一樣，喺鄉里地位高啲，講野都大聲啲

 
各有特色既大屋；佢地通常一樓闊過地下，因為鄂圖曼帝國按地面面積收稅，所以為咗避稅就變咗發水樓

 
金碧輝煌既室內空間

俯瞰 Plovdiv 


Plovdiv 既古羅馬劇場，保留得比衛城更加完整

當地壁畫