【巴爾幹遊記】Day 2 雅典衛城

嚟到雅典既第一日，本來諗住抖下，適應下旅行既節奏；但見自己仲有啲精神，就第一時間衝去雅典衛城 Acropolis。

雅典既地形有啲似羅馬，周圍都係山；而衛城正正就喺最近市中心既山丘之上。

因為地勢險要，衛城本來有人聚居，方便抵抗敵人。不過隨住雅典城邦日益壯大，衛城就剩係得番宗教用途，山上面都係神廟。

而神廟之中最出名既，就係帕特農神殿。

抵達雅典，見到清晨既雲霧仍然籠罩海上小島

 

走出市中心廣場，已經可以見到山上面既衛城

帕特農神殿係希臘黃金時期既建築，代表住雅典喺全盛時期既權勢同繁華。

成個神殿都係用最肅穆，無裝飾既多立克柱 Doric columns 支撐，但因為柱形微微向內修，所以感覺又唔會太笨重。

帕特農神殿主要祭祀雅典娜，亦即係雅典既守護神。

但係歷經多年風雨，裡面既雅典娜神像已經無影無蹤。


向衛城進發

山下面有酒神劇場，曾經上演過唔少希臘經典劇目


另一個劇場，修復得比較完整，仍然可以用到

通往衛城既入口

從衛城望番雅典，感覺好特別

帕特農神殿正面，可惜維修中

神殿背面

衛城上另一座雅典娜神殿，左邊既婢女支柱好有特色

神殿背後有一棵橄欖樹，相傳係當年雅典娜親手所種

從旁邊山丘遠眺衛城

希臘黃金時代後，帕特農神殿曾經先後改建做教堂同清真寺，甚至因為比人炮轟而殘破不堪。

而家衛城旁邊有衛城博物館，展覽相關文物。

但其實更靚既裝飾已經比英國人拎走左，擺左喺大英博物館。

而最靚既三角楣雕塑更已經喺多年既戰亂改建中破壞消失。

最後得番只剩支柱既帕特農神殿仍然傲立於世，喺衛城既山頭上俯視蒼生。


衛城博物館

裡面既展覽其實都幾靚，簡潔既水泥柱令人諗起帕特農神殿既多立克支柱

精緻既古希臘雕塑

婢女支柱既真品，每個衣著姿勢都唔同；因為怕頸唔夠粗，所以加厚頭髮加強支撐力

博物館都可以見到衛城