【巴爾幹遊記】Day 30 達爾馬提亞

之前講過今次旅程報得太多 day tour，今日繼續還債，仲要番返黑山，參觀 Perast、Kotor、Budva 三個港口城市。

雖然位處唔同國家，不過呢三個地方同 Dubrovnik 一樣，傳統上都屬於 Dalmatia 達爾馬提亞地區，亦即係克羅地亞向南延伸既一角。以前睇地圖，會覺得克羅地亞好霸道，封住嗮啲出海口。而家嚟到先知咁係因為達爾馬提亞地區同內陸既波士尼亞歷史文化都好唔同。

達爾馬提亞同巴爾幹內陸地區最大既分別，係達爾馬提亞從來無比鄂圖曼帝國佔領過，反而受到意大利/威尼斯影響更深。之前去過既內陸城市，歷史上無論係屬於鄂圖曼、保加利亞定係塞爾維亞，佢地都係陸權國家，注重搶人搶地，建立中央政權。不過今日去既港口城市就同希臘城邦比較似，唔需要好多土地，但注重外交關係，確保貿易路線暢通；佢地既政權亦相對分散，由一班貴族/大商家統治。

可能因為目標相近，所以今日去既城市建構上大同小異，都係位於港口，城市由城牆包圍，裡面有政府、教堂、同埋通常都係橙紅色屋頂既民居。眾多港口之中， Dubrovnik 最為宏偉壯觀，咁係因為歷史上 Dubrovnik 長期處於半獨立狀態，當時叫做拉古薩共和國 Republic of Ragusa。拉古薩係個好興旺既商業城邦國家，透過兩邊落注，而且作為鄂圖曼帝國既藩屬，佢地掌握由亞得里亞海到巴爾幹內陸既貿易，全盛時期甚至同威尼斯有得揮，係去到大航海時代先慢慢衰落。

今日完咗 day tour 後喺 Dubrovnik 周圍行，城裡面雖然遊客多過本地人，好多建築又係喺城邦衰落加地震後重建，但係仍然想象到當年拉古薩既繁華盛況。

 
一大朝早出門口，難得舊城無咩人

 
海邊堡壘

晨光之中既 Dubrovnik 

嚟到 Kotor 附近既峽灣

小鎮 Perast 

 
最著名係小鎮出面小島既修道院

峽灣既水流平靜，亦適合玩獨木舟

Kotor 既其中一道城門

 

Kotor 歷史比較長，裡面仲有拜占庭時代起既教堂

橫街窄巷，同 Dubrovnik 有啲似

 

俯瞰 Kotor 

 

Budva 都係古城，而家變咗度假勝地


海水好藍 

同黑山既港口告別

 

Dubrovnik 既教堂；望落去同羅馬既教堂有啲似，不過又有自己風格

老城區散步

唔知點解見到呢個獅子噴泉都幾感動，因為免費不枯竭既泉水好代表到一個地方既文明程度

夜晚既舊城區，仍然熱鬧

【巴爾幹遊記】Day 25 真相與和解

今日參觀咗 Podgorica 唯一一個博物館，之後搭巴士出發去阿爾巴尼亞首都地拉那 Tirana。雖然沿途有啲塞車，不過我都幾享受喺巴士上面睇下書、瞓下覺、起身又睇下風景、聽下音樂。

雖然好似幾寫意，但其實今日睇既書《Besieged: Life Under Fire on a Sarajevo Street》好沉重，講緊薩拉熱窩被圍城期間幾家人既故事。我係睇網上介紹搵到呢本書，之後先發現作者係寫《我們最幸福》既 Barbara Demick。Demick 係名記者，最擅長用簡潔筆觸刻畫出唔同人既面貌，《Besieged》就係佢年輕派駐東歐時初試啼聲之作。

今日雖然唔算睇咗好多，不過我最深印象係，喺波士尼亞發生內戰之前，無人估到薩拉熱窩竟然會被攻打，以至圍困三年。當年波士尼亞人雖然都知道有啲賽族人好有野心，但佢地覺得波士尼亞人口咁混雜，賽族人根本無可能建立淨係屬於佢地既領土。而且之前斯洛文尼亞同克羅地亞爭取獨立，佢地既首都都無受波及。所以當時大部分人其實係由鄉間逃難去薩拉熱窩，點知入咗去就出唔番嚟……

賽族人既行為亦令我好好奇。點解佢地當時咁快就決定動用武力，以至屠殺其他族人？點解佢地唔接受所有人共存喺同一片國土，而係一定要有自己既地方？究竟係一兩個人既野心，定係整體既民族性格都係咁？

不過我會知，塞爾維亞人骨子裡有好強烈既受害者情意結，覺得東正教徒自從喺鄂圖曼帝國之後都係受壓迫既一方。就算係尋日我喺 Podgorica 既導遊，作為黑山人佢都會比較偏向賽族，覺得而家既歷史比人扭曲咗，其實當初大家都有唔啱。所以我地成日話要成立真相與和解委員會，因為呢個世界大家如果唔肯尋求真相，對發生咗咩事無共識，最後只係自說自話，根本無和解既可能……

Podgorica 博物館主要展覽當時王族既生活

黑山最後一個國王，著住民族服裝。不過佢既子女已經好西化，得閒會打下網球保齡球

 
 
沿途景色

《Besieged》，好似無中譯本

嚟到 Tirana，巴士站好近一個大商場，雖然一嚟到就係睇到 Tirana 最發達既一面 

【巴爾幹遊記】Day 24 黑山一日遊

一朝早離開薩拉熱窩，出發去黑山既首都波德戈里察 Podgorica。當初本來計劃去 Kotor 睇峽灣，不過而家會先去阿爾巴尼亞，如果唔想坐過夜巴士就要先喺 Podgorica 過一晚。巴爾幹就有呢度唔好，交通唔算好方便，好多時候都要以首都作為接駁點。

由於黑山用歐羅，我一直以為佢係歐盟國家，嚟到之後先發現佢地未有經歐盟同意，只係自己攞嚟用。原來當初塞爾維亞既貨幣第納爾因為比人制裁而瘋狂貶值，黑山人就直接轉用德國馬克，之後又跟德國用歐羅。其實呢程幾乎全部巴爾幹國家既貨幣都係同歐羅掛鉤，不過就無黑山做得咁直接。

Podgorica 係黑山第一大城，但其實只有十五萬人口，市中心既獨立廣場規模同一個鎮仔差唔多。不過嚟到都有啲開心，因為之前幾個禮拜一直都喺旅遊區出沒，周圍都係地標、紀念品、找換店；今日終於無咗做遊客既感覺，只係喺超市行下，睇下本地人喺河邊玩水，喺公園放下狗，咁就一日。

由薩拉熱窩南下，開始又變得山巒起伏

去過薩拉熱窩，而家見到賽族共和國個牌都覺得唔係幾舒服

不愧係黑山，沿途都可見到湖光山色

旅遊資訊站出面既地圖，睇嚟真係無咩地方去，連 pools 同 sport center 都要列出嚟

獨立廣場

市政府

喺市中心行出去幾步已經有個大公園

二戰時被意大利人佔領既紀念碑

河邊景色

Podgorica 都有土耳其風格既舊城，不過城市喺二戰時被轟炸，所以大部分建築都係重建

橋底既土耳其澡堂，而家變咗 cafe 同書店

今日下晝都參加咗個 walking tour，得兩個人參加。不過人少少都幾好，可以多啲同導遊傾下計，完咗一齊飲咖啡，感覺幾舒服

市外景色

今朝無咩點食野，夜晚補番，呢個係當地名菜炸芝士雞肉卷