朗遊記

2024年6月8日星期六

【巴爾幹遊記】Day 6 史前與現代

一日遊

今日主要去咗兩個地方，分別代表希臘既史前同現代。最近越嚟越鐘意參加 day tour，一方面可以去到自己想去既地點，另一方面又唔使 plan 太多行程。不過呢個都要喺歐洲先做到，好似之前去印度/非洲，地點相隔太遠，就做唔到呢個效果。

途中經過科林斯運河，係世上最窄既運河

另一處古希臘遺跡既劇場，每年都會有古希臘戲劇表演

邁錫尼
如果雅典衛城代表古希臘既黃金時代，邁錫尼 Mycenae 就係古希臘文明既啟蒙時期，比帕特農神殿仲要早一千年。邁錫尼人既歷史，亦成為古希臘人既傳說-- 相傳殺死梅杜莎既珀修斯，就係邁錫尼既始祖；而主導特洛伊戰爭既阿伽門農，亦係邁錫尼國王。如今喺邁錫尼，剩係得番當年既王宮遺址，同埋歐洲最古老既雕塑，大門上面佇立既雄獅。

遠望邁錫尼王宮

獅門 Lion's Gate

較做黑白，更加有味道

由王宮望出去既山野風光

王宮背後係兩座陡峭大山，應該有防衛作用？

王宮前大道

現代首都
去完邁錫尼，時間一跳三千年，嚟到現代希臘第一個首都納夫普利翁。當年希臘獨立時雅典仲係一個小農村，反而納夫普利翁唔單止位處要津，而且有健全既防衛設施，所以就比人揀咗做首都。不過呢啲都講緊百幾年前，自從希臘將首都搬咗去雅典之後，納夫普利翁就慢慢衰落，而家變咗做一個度假小鎮，剩係得番憲法廣場、山上城堡等景點供人憑吊。

今次挑戰山上面既城堡，聽講要行999級樓梯

喺樓梯已經可以俯瞰納夫普利翁全貌

城堡由威尼斯人建成，感覺都有啲似克羅地亞既 Dubrovnik

落番山，行下小鎮，又係一日

2024年6月7日星期五

【巴爾幹遊記】Day 5 蘇格拉底

前兩日行程緊湊，今日輕鬆啲，十點幾先出發，首先去城西既雅典學院遺址。雅典學院 Academy 由柏拉圖創立，當年佢喺老師蘇格拉底死後雲遊四方，終於喺十年後成立一間學校，專心研究學問。雅典學院亦都係西方大學既原型。而家遺址之上係一個公園，不過由於未完全發掘完，所以周圍無咩野睇。好在附近有個小型博物館，好有心咁介紹柏拉圖同蘇格拉底既生平同學說，先算不枉此行。

學院遺跡

展覽好豐富既博物館

離開學院遺址，食個飯，下晝又返到衛城附近。前日講到衛城喺古希臘時期主要係宗教用途，供奉雅典娜同其他神祗；而雅典既政治事務就喺旁邊既普尼克斯山 Pynx 舉行，雅典公民每年會喺山上面開十次大會，決定城邦既大小事項。

最近每次食飯都會叫沙律，每次都好大份

公民大會遺址，正正對住衛城

喺普尼克斯山附近有個山洞，傳說係當年蘇格拉底服刑既地方。我坐喺山洞旁邊，繼續讀完蘇格拉底既自辯。原來自從得到德爾菲神諭，知道自己係雅典最有智慧既人後，蘇格拉底就覺得呢個係神比佢既使命，要周圍檢驗人，睇下佢地有無發現自己既無知。蘇格拉底亦自比為沉睡駿馬旁邊既牛蠅，要叮到雅典人清醒為止。佢好痛心，雅典人點解剩係識得追求金錢，追求名譽地位，但就唔會追求良善，追求做一個更好既人。

傳說既山洞

蘇格拉底被譽為西方哲學之父，就係因為佢將哲學的焦點，由大自然轉移番去人上面，尋問點先係美好生活，點先能夠活出無憾人生。哲學成日按字根被解讀為“愛智”；但原來喺智慧背後，更重要係有一個仁心，希望每個人都可以活得更好。

臨服刑之前，蘇格拉底對判佢死刑既民眾講，佢唔怕死，除咗因為佢願意不惜一死去捍衛己見外，亦都因為死亡對佢嚟講並不可怕。佢描述，死之後一係無知無覺，從此大覺瞓，一係就會落到陰間，可以同古希臘眾多英雄人物相聚，繼續佢對美好人生既追尋，兩者都比繼續活喺世上勞勞碌碌更好。不過無論佢既結論合唔合理，蘇格拉底既死依然為西方哲學打下烙印，無數思想學派會繼續佢既追尋，思考何為良善社會，美好人生。

本來諗住喺山上面睇日落，不過今日烏雲密佈，仲落咗場雨

不過就竟然見到帕特農神殿上既彩虹，唔通又係蘇格拉底顯靈？

喺電話調完色既相，感覺更特別

夜晚去睇戲，戲院賣點係可以望埋衛城。今日套戲係希臘出品，講一個婆婆殺嬰既故事，主題有啲沉重

每當見到山上閃閃發光既衛城，都會諗起聖經裡面話，“你們是世上的光。城造在山上，並不能隱藏……”

2024年6月6日星期四

尋晚寫完遊記已經係凌晨兩點，今朝又要七點起身參加 day tour ，諗起都覺得有啲玩命。

今日既 day tour 主要去德爾菲 Delphi。喺古希臘神話中，德爾菲係世界中心，亦係太陽神阿波羅公佈神諭既地方。收到問題後，阿波羅既女先知會先吸入地底產生既（有毒）蒸汽，然後發出不知名聲音，再由女祭司解讀。雖然過程好似好兒戲，但德爾菲曾經有段時間能夠主宰希臘各城邦既命運-- 城邦之間或戰或和，都係由女祭司一言而決。

神廟前既步道

神殿旁邊有唔少金庫，收藏咗各城邦供奉比阿波羅既祭品

阿波羅神殿

如今只剩低斷柱頹垣

阿波羅亦係音樂之神，神殿後有劇場舉辦音樂節

附近既雅典娜神殿

喺神殿出面竟然見到七色彩雲，唔通有咩預兆？

認識自己
德爾菲神殿前面列出左幾個格言，其中最出名既係“認識你自己”。蘇格拉底亦都曾經喺度得到神諭，宣稱佢係雅典最有智慧既人。根據蘇格拉底既自述，佢本來唔相信，所以就周圍問人，睇下有無人比佢更有智慧；但係佢發覺原來每個人都會唔識扮識，覺得自己好有智慧，唯有佢一個願意真心承認自己既無知，亦因為咁而成為雅典最有智慧既人。不過喺過程中蘇格拉底都得罪咗唔少權貴，種下咗佢日後比人屈死既遠因。

德爾菲博物館，可以見到以前既神殿模型

近代發掘到既青銅騎手塑像。原來古希臘既雕像都係以青銅為主，不過而家好少見到，所以呢尊都好罕有

另外發掘到既哲學家雕像，個樣都幾似蘇格拉底

山區小鎮
離開德爾菲，下晝我地去左附近既一個山區小鎮 Arachova。希臘既山雖然唔算好高，但形狀陡峭，高聳入雲，令人明白點解當年古希臘人會相信眾神就住喺山上面。Arachova 係個傳統小鎮，白牆紅瓦，幾有風味。歷史上 Arachova 亦有戰略意義，希臘人曾經喺度打退鄂圖曼人，爭取獨立。而家Arachova 係滑雪勝地，不過夏天就少啲人嚟，比人可以喺餐廳度慢慢食下野，飽覽眼前既山區景色。

希臘山景

由餐廳露台可以見到成個小鎮

遠處既鐘樓特別搶眼

由鐘樓望出去既小鎮景色

2024年6月5日星期三

【巴爾幹遊記】Day 3 雅典古城區

今日參加咗個 walking tour，繼續喺古城區遊蕩。不過話就話古城，根據導遊講法，其實雅典既舊城區並唔算特別古老，大部分建築都只有百幾年歷史。其中主要原因，係因為雅典喺中世紀之後早被廢棄，有幾百年都只係一個農村。一直去到希臘王國從鄂圖曼獨立，決定搬番去舊都，雅典先開始重新建設。

古城區建築，好多地方都變左商店街

跳蚤市場

不過呢啲相對新既建築驟眼睇又唔太覺新。一方面佢地保養唔算多，保留咗一種歷史感，另一方面佢地大部分都係按照新古典主義風格建成，所以同古希臘建築有啲似，有啲甚至起得比古建築更加浮誇，因為希臘立國初期為左顯示同鄂圖曼唔同，所以特登起多啲類似古希臘風格既建築。

希臘科學院同國家圖書館，都係好浮誇既古希臘風格建築

雅典國會，前面有士兵換更

行完古城區，下晝終於去番真正既古跡，古希臘廣場 Ancient Agora。廣場位於衛城山下，係古希臘人聚集、交易同埋舉行慶典既地方，唔少出名既古希臘人-- 蘇格拉底、柏拉圖、希羅多德都曾經喺度打躉。雖然有啲矯情，但我都買左本蘇格拉底死前既自辯，一邊讀佢既說話，一邊想象佢係古希臘廣場四圍問人奇怪問題既境況。