朗遊記

2024年7月9日星期二

【巴爾幹遊記】Day 37 失落關係

喺 Zagreb 仲有一日，本來預留嚟去 Plitvice Lakes，不過最後都係決定留喺市中心，悠悠閒閒咁過一日，順便處理下個人事務。始終番到香港，就算有時間，都未必有呢個環境，可以心無旁騖咁過日子。

今日亦去咗失戀博物館 Museum of Broken Relationships。本來諗住係啲 gimmick 野，但係嚟到都覺得幾震撼。原來 broken relationships 唔單止解失戀，亦都包括所有斷裂、失落既關係，例如親人離世，同朋友絕交等等。睇住世界各地既人捐贈既物品，講述佢地既故事，自己都會諗番起曾經失落既關係，特別係已經離世既親人。

喺展覽裡面，亦都見到好多失戀既自白，都係講述彼此既差異已經大到無可挽回。我亦會諗，雖然而家同女朋友既關係都算好，但係會唔會喺十年、二十年後，會有一日，發現自己同佢既關係都去到一個無可挽回既地步？可能呢個就係博物館既魔力，好似一面鏡咁，等你可以對比自己既境況，觀照內心。如果大家有機會嚟到 Zagreb，都可以嚟呢個失落關係博物館感受下呢。

悠閒一日，由早餐開始

搭好短既纜車上 upper town

失戀博物館；大家都睇得好專注

當初愛得越深，傷得越重

好多唔同既故事，有啲都睇到個心揪住揪住

順便去埋旁邊既素人藝術博物館 Museum of Naïve Art；Zagreb 都幾多唔同種類既博物館，不過好多都無開

再喺下城區行下，就番咗民宿了

2024年7月8日星期一

【巴爾幹遊記】Day 36 克羅地亞

今日繼續周圍行下 Zagreb。Zagreb 係克羅地亞首都，亦都係克羅地亞本土既中心。克羅地亞傳統上由三個地區組成，前幾日去過既 Dubrovnik 同 Split 都屬於沿海既達爾馬提亞地區，比較受意大利影響；所以為咗對克羅地亞印象更加完整，今次就特登改行程嚟到中部既 Zagreb。

由於克羅地亞大部分時間都係匈牙利既領土，所以 Zagreb 都比較似中歐既城市。佢同好多中世紀城市一樣，首先有教區，然後喺旁邊建立直屬國王既自由市 Royal Free City，然後再一路向外擴充。而家既 Zagreb，仍然可以分為歷史比較久遠，位於山上面既上城，同埋山下面，有十九世紀風格建築既下城。

今日亦都參加咗一個本地團，由克羅地亞既角度了解當年既獨立戰爭，呢度叫 Homeland War。克羅地亞同塞爾維亞既恩怨情仇，亦都要由上世紀初開始講起。話說克羅地亞本土一直係匈牙利，以至奧匈帝國屬地，但喺一戰後奧匈帝國解體，克羅地亞就被併入以塞爾維亞為主既南斯拉夫王國。但係比較西化既克羅地亞人睇唔起賽族人，而且亦都不滿政策偏向賽族，所以一直有獨立既聲音。

終於到咗二戰，有克羅地亞人喺納粹既支持下獨立，成為納粹既傀儡國家。喺納粹既影響下佢地亦都成立集中營，屠殺塞爾維亞人同猶太人。二戰後鐵托統一南斯拉夫，但係相對發達既克羅地亞仍然會不滿自己要援助其他比較窮既地區。終於當南斯拉夫解體，各地民族主義高漲，克羅地亞亦都要求獨立。

內戰一開始既時候克羅地亞既情況同波士尼亞有啲似，都係比南斯拉夫/塞爾維亞軍隊壓制，而且境內既賽族人亦成立自治區。不過由於塞爾維亞想集中兵力對付波士尼亞，而且克羅地亞有其他西歐國家支持，所以好快就逐出塞爾維亞軍隊，甚至極速掃除境內既賽族自治區。亦都因為咁，所以克羅地亞既局勢相對穩定，亦都無好似波士尼亞咁多種族衝突。

呢個星期喺克羅地亞，雖然都會聽到本地人投訴物價飛漲，政府腐敗，但最少呢度既國民唔會自相殘殺，國土亦都無好似波士尼亞咁分裂。喺加入歐盟之後，加上旅遊業帶動，克羅地亞既經濟亦都發展得唔錯，就快追上希臘。不過物價就的確唔平，雖然喺 Zagreb 算係好少少……

克羅地亞爭取獨立既國父

另一個一戰前既克羅地亞領袖，最後被暗殺

今日參加 walking tour 既人數都唔少，總共要開三團，有一團講西班牙話

上城區既總統府，感覺都幾平實

好吸睛既教堂，左邊代表克羅地亞三個主要地區，右邊就係 Zagreb 既市徽

下城區，比較現代化

上城區既鐘樓仲有午炮。講起嚟我都無見過怡和午炮發射添

Zagreb 大教堂，但因為頻頻地震既關係所以幾十年嚟都未完成

喺戲院見到王家衛海報。講起香港導演，好似真係得王家衛有依個國際地位

納粹克羅地亞喺戰時建造既隧道/防空洞

國家劇場

咁啱舉行緊戶外表演，好似唱緊經典金曲，觀眾都好投入

2024年7月7日星期日

【巴爾幹遊記】Day 35 無力感

離開 Split，今日去克羅地亞既首都薩格勒布 Zagreb。本來 Split 之後係諗住沿住海岸線北上去意大利既港口 Trieste，不過今次嚟到巴爾幹，既然都去咗 Belgrade 同 Sarajevo，就想去埋 Zagreb，了解克羅地亞人點睇當年既內戰。

今日喺巴士，終於完成之前提過，有關薩拉熱窩圍城既《Beseiged》。其實睇完都覺得幾無力，因為薩拉熱窩，以至當年既波士尼亞人根本完全無能力同繼承咗南斯拉夫軍備既塞爾維亞軍隊對抗。所以佢地除咗努力求存之外，由頭到尾都係等緊美國介入。但係美國有自己既算盤，即使北約喺 95年開始轟炸塞爾維亞逼佢地停火，都有傳係克林頓為咗一年後既總統大選預備，所以先唔早啲開始軍事行動。

而喺無外國幫手既日子，薩拉熱窩既居民只好自求多福-- 因為喺城外面既賽族狙擊手根本唔當佢地係人，即使係細路、傷者同老人家都可以照射不誤。而即使當年好出名，比薩拉熱窩偷運物資既 Tunnel of Hope，其實都係賽族人刻意容許。佢地當年一早就知有呢條隧道，亦都絕對有能力封鎖出入口。但賽族人知道，只要隧道存在，薩拉熱窩人就有個希望可以偷走出去，然後薩拉熱窩留低既人就會越嚟越少，越嚟越絕望……

終於，喺歐美既介入下，賽族同波士尼亞軍隊停火，簽訂協議，約定三族共存。我地今日睇番，會覺得能夠簽訂和平協議已經好好，但原來喺波士尼亞人眼中，當年既協議承認咗賽族種族清洗既後果，將賽族屠殺完波士尼亞人之後霸到既地送比佢地。而曾經三族融洽生活既薩拉熱窩，種族之間既分界亦都越嚟越明顯，一時再無融合既可能。

《Beseiged》既作者喺停火十年後番返薩拉熱窩，有啲驚喜城市同建築都無咩點變。但係當地人同佢講，咁係經濟發展遲緩既後果。我今次去到薩拉熱窩，反而覺得好多地方都翻新過，市面一片興旺。但我會知道，咁係因為有好多伊斯蘭國家既資金喺裡面運作。巴爾幹國家同以往一樣，仍然係國小民窮，好易受到其他大國既操控-- 塞爾維亞有俄羅斯撐腰，而土耳其就積極喺波士尼亞同阿爾巴尼亞擴展影響力。巴爾幹既衝突，暫時亦都唔會完結。

離開 Split

告別亞得里亞海

沿途開始多山

Zagreb 市面，好多歐陸風格建築

成日聽人講話 Zagreb 無野睇。唔知係咪為咗反擊，呢度既路牌特別多 :P

市中心廣場。見到輕鐵，唔知點解令我諗起曼城

又係超多路牌

黃昏

可能係星期六，夜晚都幾多人

2024年7月6日星期六

【巴爾幹遊記】Day 34 出海去

尋日參觀完 Split，今日去出面既外島。Dubrovik 同 Split 都對住亞得里亞海，對岸就係意大利。好有趣地，雖然兩邊都係海岸，但係克羅地亞呢邊有好多島，號稱“千島之國”，而意大利嗰邊就一個島都無。當年威尼斯共和國要拓展航線，攞咗好多島同港口做根據地，方便補給，所以克羅地亞沿岸有好長時間屬於威尼斯既勢力範圍，同巴爾幹既文化有啲分別。

雖然好多島聽講都好靚，不過呢程都去咗唔少港口城市，所以最後報咗個 boat trip，出海遊下水。亞得里亞海既海水好清，色澤蔚藍，到淺水就變成翠綠色，非常吸引。今日仲有機會去有個沉船既地方浮潛，睇下嗰度既生態環境。不過今日就唔算睇到好多魚，就無之前去大堡礁咁，番到民宿合埋眼都仍然可以見到魚影游動了。