尋日話盧比安納無咩故事，只係講咗一半。盧比安納無既，係處於宏大背景下既故事-- 斯洛文尼亞長期處於帝國邊陲，所以無塞爾維亞既苦大仇深，亦無波士尼亞既戰火連天。喺盧比安納發生過最大既政治事件，就係二百年前奧地利曾經同其他帝國喺度開過幾個月會議。
但係無宏大敘事，反而令斯洛文尼亞人有機會好好體驗生活。今日雖然有啲熱，但盧比安納係我出發以嚟覺得最好行既城市-- 呢度唔單止有世界上第一個行人專用區，而且周圍都有樹蔭，有特色小店，甚至有啲奇奇怪怪既雕塑-- 呢啲景象都話我知，呢度既人活得有滋有味，有閒暇去發展生活情趣。
唔單止係咁，斯洛文尼亞人亦都係我嚟到巴爾幹以嚟見到最友善既一班人。而且佢地既友善，唔係農村好淳樸腼腆嗰種友善，而係因為物質充裕，成長喺一個相對善意既環境，自然對人和藹可親嗰種友善。
喺盧比安納市中心既廣場，豎立既雕像亦唔係某個國王將軍，而係國民詩人 Prešeren 普列舍仁。喺獨立之後，斯洛文尼亞甚至將原本既國歌《前進吧，榮耀旗幟》改做普列舍仁所作既《祝酒歌》，歌詞大意係祝願世界各地和平安樂，永無戰爭。呢啲亦都令我反思，今次嚟到巴爾幹好似放太多注意力喺政治上面。但係政客既手段，正正係想國民成日留意政治，記得同邊個鄰國有仇，甚至活喺恐懼底下，成日掛住要爭取生存空間……
如果世界上多啲斯洛文尼亞，小國寡民，富而好禮，唔使成日掛住爭霸崛起，咁會幾好。
朝早行下市集，斯洛文尼亞雖然係巴爾幹人均 GDP 最高既國家，但係物價都唔算好貴
市內主教座堂，屬於 High Baroque 風格
市內主教座堂，屬於 High Baroque 風格
市中心旁邊既後花園
河景都係百看不厭
甚至有啲惡趣味-- 市內扣愛情鎖既橋叫“屠夫橋”，上面仲有個比人剝皮既雕塑
雖然話無咩大歷史，但係斯洛文尼亞其實有好多原始人既聚居地，甚至有世界上最古老既笛子同車輪
市中心既詩人雕塑，旁邊係佢作國歌既譯文
市內博物館既擺設，陳列出盧比安納知名同不知名既人物，代表城市由大家塑造
喺山上城堡望番盧比安納全境。遠處可以見到阿爾卑斯山餘脈
喺山上城堡望番盧比安納全境。遠處可以見到阿爾卑斯山餘脈
日落
.jpg)
沒有留言:
張貼留言