布萊德湖 Lake Bled 係一座冰蝕湖，上面有斯洛文尼亞唯一一個島。布萊德島上面既教堂大概係斯洛文尼亞最出名既地方，可能大家見到相都會認得。不過今日湖水雖然湛藍而透明，景色始終同相仲有一段距離。可能季節或者角度唔啱？撐船去布萊德島係獨市生意，每人開價十八歐羅，個人就覺得性價比唔算好高。
反而下晝去既鐘乳石洞就吸引好多。斯洛文尼亞境內有好多石灰岩組成既溶洞，連喀斯特地形呢個名都係嚟自斯洛文尼亞南部。波斯托伊納洞 Postojna Cave 係斯洛文尼亞第二大溶洞，亦都係另外一個主要旅遊景點。成個溶洞全長二十公里，都係由地底河流沖刷而成。溶洞裡面有好多鐘乳石同石筍，都係嚟自雨水滲透石灰岩，變成包含鈣質既水滴，鈣質沉澱後就留低薄薄一層岩石，日積月累就變成鐘乳石，或者喺地面積累上嚟既石筍。
我地一團人首先坐類似越礦飛車既火車嚟到溶洞既深處。溶洞內部好大，就好似地心歷險記，或者魔戒裡面半獸人住既巢穴咁，非常震撼。嚟到溶洞，先知道原來鐘乳石既形態有好多種，平時最常見既係錐體既尖柱，但係原來都有啲好似意大利粉、雪糕，甚至輕紗咁，薄到可以透光。鐘乳石每一百年先生一厘米，普普通通一條半米長既鐘乳石，可能已經包含成個人類歷史。
參觀完 Postojna Cave，亦代表斯洛文尼亞既旅程完結。本來嚟斯洛文尼亞係無心插柳，只係打算喺度坐飛機番香港，順便參觀多一個南斯拉夫國家。但係嚟到後又覺得呢個地方幾吸引，而且因為斯洛文尼亞受奧地利既影響好深，令我都對哈布斯堡皇朝呢個中歐強權開始有啲興趣，睇下之後有無機會了解更多。
聽日就會上機番香港，大概會喺機上寫埋總結，概括今次喺巴爾幹半島四十日裡面既所見所聞。暫時就喺呢度歇筆，大家香港見。
首先嚟到山上面既城堡，俯瞰 Lake Bled
城堡既另一邊對住農村，遠處係斯洛文尼亞最高峰 Triglav
嚟到 Lake Bled
撐平底船去 Bled Island
遠處係鐵托既別墅。鐵托好識享受，南斯拉夫周圍既旅遊景點都有佢住處
島上教堂
Lake Bled 既水好清，可以一眼望到底
Lake Bled 亦都係好多人嚟度假既地方，咁啱有班小朋友喺度玩樹上跳水
斯洛文尼亞出名既 Cream Cake 都係喺 Lake Bled 附近既酒店發明，Cream cake 面頭係酥皮，中間係忌廉同吉士醬，食完好滯
望番去城堡
另一座起喺洞穴旁邊既城堡
起喺洞穴裡面，防衛性能好好，而且仲有源源不絕既淡水（地下水）供應
城堡最入面，再入去仲有密道可以走出去補給
較下白平衡，感覺又幾得意
先坐小火車入溶洞
溶洞既環境可以用鬼斧神工嚟形容；不過可能我用手機影，就唔係好拍到
唔同形狀既鐘乳石
就係咁一滴滴水累積而成
溶洞最出名既雪糕石筍
旅程既最後一餐，食好啲；前面叫 Obrok，話係斯洛文尼亞傳統菜色，但其實幾似 Schnitzel
.jpg)
沒有留言:
張貼留言